Gaur egungo munduan, tragedia historikorik lazgarriena izan daiteke Palestinakoa; baina, egunero telebistan ikusten dugun triskantzaz harago, hondamendi horrek baditu bere aurrekariak, zioak, zergatiak. Horien ulertzen laguntzeko liburua idatzi du Markel Elortza historia-irakasleak, Maitane Azurmendi artistaren ilustrazioez lagunduta. Hamar ataletan, azken 100 urte pasatxoko historia kontatzen digu, bitarteko gerrak eta krimenak, sionismoaren ideologia, palestinarren erresistentzia, errefuxiatuak, apartheida, nazioartearen jokabidea, akordioen zailtasunak eta haien urraketak.